Szpacyrkiem po Cieszynie: Umynczóno tabulka

Dzisio tyn szpacyr weznym łod Rynku, bo żech spozdrził, że nie idym Szersznika, jyno jakómsi ulicóm CYFRA +. Wyłoślił mi to jedyn taryfiosz, że tym kszeft z tymi antynami uż dwa roki nie egzystuje, ale na ścianie tam, kaj mo być tabulka z ulicóm, fórt wisi ta reklama. I jak gdosi nie wiy, to se myśli, że je na jakisi telewizyjnej ulicy. U nas to je zawsze tak, że kierysi to przirazi, ale ściepać to uż żodnego do tego nie idzie nónś. Jak sie obezdrzicie przez lewe ramie, to tuplowanie uwidzicie z drugi stróny cesty, że jednakowóż sóm żeście na Szersznika, bo tam przirażóno je do słupka jakosi eszcze powojynno umynczóno tabulka. Je to przeca w samym postrzodku miasta i nima możne, żeby kierysi tego dziadowstwa z łojców miasta uż nie widzioł. W ratuszu mómy biuro łod promocyji miasta i robi w nim sztyry, a pół człowieka, to choćby tyn pół sie roz do tydnia przeszeł po mieście, to by to przeca spozdrił. Kapke dali, jak pokroczymy ku klasztoru Miynszych Franciszkanów, to sie nóm ciepnie na łoczy kszeft z gazetami i cygaretlami. Bardziyj jednakowóż z cygaretlami, bo za jejimi auzlagami i na ścianie jyno zachwolajóm jakisi elektróniczne cygaretle. Nie wiym, co to je, bo jo nie kurzym, ale se myślym, że jak s tóm elektrónikóm bydym tak wartko pokraczować, to za chwile bydymy pokurzować MP-3, komórki, a możne aji stare telewizory.
A teraz zać fajny wic: "Elektrykorz prawi do swojigo halangra: - Gynek weź ty dróty do rynki i fest ściś... - Poczułeś cosi? - Ni. - To możesz to ciepnóś na bok, bo pod napjiyncim sóm ty insze dróty".
Tóż mjyjcie sie wszedcy dobrze i wiesiołego popióntku.