Szpacyrkiem po Cieszynie: Niewiela my mieli

Minyli my tóm gospode kiero downij "Tympo" sie nazywała i jak eszcze se niekierzi spóminajóm to moc placuku wieczoru nigdy tam nie było. Tóż to kwicisko jak to moja starka prawiła trzeja było pić na tympa i isto łod tego ta gospoda tak sie nazywała. Jo se spómnioł, że eszcze niekierzi chłopi prawili na nióm "U krowski rz..i". Możne, że kierysi to eszcze pamjynto tak samo jak u"Szwemy" w kierej też po połedniu nigdy nie było na czym siednóć. To były piekne czasy, bo mołoś niewiela my wtedy mieli a żodyn niczego inszym nie zowiścił i był z tego rod co mioł. Kapke dalij we dwiyrzach je kiosek z gazetami i aż dziw biere, że eszcze tam nie sprzedujóm lajbików. Zaś pore kroków dalij sóm dwiyrze, kiere isto uż sto roków nie były otwiyrane i możne skyrs tego nad nimi nasze Cieszyński Muzeum swój szyld se powiesiło.Nie bardzo to pasuje to tego wielkigo plakatu z włoskimi lodani, kiery niżyj wisi, ale szef muzeum isto musi mieć z Włochami jakisi drobne. Zaroz za winklym je kszeft, kiery mo dwa ganc inksze szyldy i chociożbych chcioł to nie wiym na iste czyji to je. Tak lepszyj nie bydym nic pisoł o nich i pujdym dalij za winkiel za kierym kiejsi przedowali kwiotki. Teraz uż tam żodnego nima, a szkoda bo chocioż by nie bylo widać tej szpatnie odrzitej ściany na kierej gdosi prziwiesił ślubny plakat. Tej brzidocie prziglóndo sie z drugi ściany jakisi świynty,a nic nie pisze jako sie nazywo i nie wiym jako go zmianować. Posłóchejcie - to przeca ni ma możne, bo isto musioł sie na mie kierysi poskarżyć, że ich łopiszym i wartko postawili rusztónek do łokoła tej chałupy i teraz uż ganc nic nie widać.

A teraz zaś fajny wic:
Badóm was panoczku i łoklepujym, a nimogym prziś na to co wóm chybio.- I tak se to miarkujym, że isto to je kwicisko...
- Nó to dobre panie dochtór to jo mogym prziś nieskorzij jak wykrzyźbióm.

Tóż mjyjcie sie wszedcy dobrze i wiesiołego popióntku.